Umferðin um Keflavíkurflugvöll er alla jafna margfalt meiri en um Vogaflugvöll við Þórshöfn í Færeyjum. Þannig flugu 769 þúsund farþegar til og frá Keflavíkurflugvelli fyrstu tvo mánuði ársins en aðeins 44 þúsund fóru um færeyska flugvöllinn.
Svo kom heimsfaraldurinn og þá varð samdrátturinn á báðum flugvöllum gríðarlegur. Batinn í Færeyjum í sumar og í haust hefur þó verið miklu betri en hér á landi eins og sjá má á línuritinu hér fyrir neðan.
Í október fækkaði farþegum á Vogaflugvelli 56 prósent en 97 prósent á Keflavíkurflugvelli. Þá fóru rúmlega nítján þúsund farþegar um Flugstöð Leifs Eiríkssonar en hátt í sextán þúsund um flugstöðina við Vogaflugvöll.
Regin I. Jakobsen, flugvallarstjóri í Færeyjum, segir í samtali við Túrista að heimamenn sjálfir hafi verið fjölmennastir í farþegahópnum í október. Þannig var 41 prósent farþega fólk sem búsett er í Færeyjum. 11 prósent hópsins voru Færeyingar sem eiga heima í útlöndum og hlutfall Dana var 38 prósent. Tíundi hver farþegi á Vogaflugvelli kom frá öðrum löndum. Langflestir frá Evrópu að sögn flugvallarstjórans.
Í ljósi þess að farþegar eru tvítaldir í fluggeiranum þá þýðir þetta að nærri fjögur þúsund erlendir ferðamenn, langflestir danskir, hafa lagt leið sína til Færeyja í síðasta mánuði.
Til samanburðar þá leiddi talning Ferðamálastofu á Keflavíkurflugvelli í ljós að um sex þúsund útlendingar flugu frá landinu í október. Meðtaldir útlendingar búsettir hér á landi og til marks um það þá var fjórði hver erlendi farþega á Keflavíkurflugvelli frá Póllandi.
Í Færeyjum eru farþega aftur á móti flokkaðir eftir því hvar þeir búa en það hefur ekki verið gert hér á landi.
Skýringin á því að farþegahópurinn á Vogaflugvelli hefur ekki skroppið eins mikið saman og hér á landi kann að liggja í aðgerðum við landamærin. Í Færeyjum er farið fram á tvöfalda skimun, bæði við komu og svo aftur sex dögum síðar, en þar þarf ekki í sóttkví á milli prófana. Fólk er þó beðið um að huga vel að persónulegum sóttvörnum á þessum tímabili.
Hér á landi verður fólk að fara í sóttkví á milli prófana en reyndar er líka hægt að sleppa skimunin alfarið og fara frekar í tveggja vikna sóttkví. Í Færeyjum voru Covid-19 smitin fá í síðasta mánuði eða sextán samtals skv.
