Ef Reykjavíkurborg breytir deildiskipulagi sínu þá verður hægt að hefja framkvæmdir nú þegar við byggingu Four Seasons hótels á lóð malasíska kaupsýslumannsins Vincent Tan við Reykjavíkurhöfn. Þetta kom fram í viðtali Morgunblaðsins við Tryggva Þór Herbertsson, stjórnarformann Icelandairhótelanna, í gær.
Tryggvi er umsjónarmaður fjárfestinga Vincent Tan en fjárfestingafélag hans keypti 75 prósent hlut í Icelandair hótelunum í vor.
Deiliskipulagið er ekki eina atriðið sem er ófrágengið því samkvæmt svari frá Four Seasons, við fyrirspurn Túrista, þá eru viðræður um hótelið á algjöru byrjunarstigi og ekkert samkomulag liggur fyrir.
Aðspurður segir Tryggi Þór, í samtali við Túrista, að hann standi við fyrri orð sín að hægt sé að hefja framkvæmdir við bygginguna nú þegar. Hins vegar verði fyrst hægt að ganga frá samningum við Four Seasons þegar byggingarleyfi er í höfn.
Líkt og Túristi greindi frá fyrr í dag þá eru sterk tengsl milli Richard L. Friedmann, forsprakka Marriott Edition hótelsins við Hörpu, og Four Seasons hótelkeðjunnar. Þannig vinnur fyrirtæki Friedmann að byggingu tveggja hótela sem rekin verða af Four Seasons. Auk þess sat Friedmann í fjölda ára í stjórn hótelkeðjunnar.