Í uppgjöri sínu við Andra Má Ingólfsson í fyrra þá tók Arion banki yfir ferðaskrifstofurnar sem áður tilheyrðu Primera Travel Group ehf. Andri Már hafði flutt þær yfir í danska félagið TravelCo Nordic stuttu eftir gjaldþrot Primera Air haustið 2018.
Nú er TravelCo Nordic líka orðið gjaldþrota en félagið var ennþá í eigu Arion banka. Bankinn keypti hins vegar eignir Heimsferða og vörumerki dönsku ferðaskrifstofunnar Bravo Tours út úr þrotabúinu í síðustu viku.
Farþegaskuldbindingar ferðaskrifstofanna sem heyrðu undir TravelCo Nordic lenda hins vegar á danska ferðaábyrgðasjóðnum. Í tilkynningu frá sjóðnum fyrir helgi segir að tjónið verði um 100 milljónir danskra króna og þar með það mesta í sögu sjóðsins. Upphæðin jafngildir um 2,2 milljörðum króna.
Í útskýringum Arion banka á þessum eignatilfærslum og því tjóni sem nú lendir á dönskum skattgreiðendum segir að tilboði bankans í eignir TravelCo Nordic hafi verið tekið með vitneskju og samþykki danska ferðaábyrgðasjóðsins.
Spurð um þetta atriði þá útskýrir Birgitte Fjeldhoff, framkvæmdastjóri sjóðsins, í svari til Túrista, að þar á bæ hafi verið leitast eftir að fá inn eins mikið fé og hægt væri til að standa undir kröfum. Af þeim sökum hafi sjóðurinn gefið skiptastjóra samþykki fyrir því að ganga til samninga við þann kaupanda sem skilaði þrotabúinu mestum tekjum.
Fjeldhoff segir það ekki nýmæli að eigendur gjaldþrota ferðaskrifstofa kaupi hluta af rekstrinum út úr þrotabúinu líkt og Arion banki hefur nú gert.
Sem fyrr segir var aðeins vörumerki Bravo Tours keypt úr þrotabúi TravelCo Nordic. Sú eign var svo færð yfir í nýtt félag, PH Bravo. Arion banki fer með helmingshlut í því fyrirtæki ásamt dönskum fjárfestum og nemur hlutafé í því félagi 43 milljónum danskra króna samkvæmt frétt danska viðskiptaritisins Finans.
Sú upphæð jafngildir um 960 milljónum íslenskra króna og í ljósi eignarhluta Arion í þessu félagi þá má gera ráð fyrir að bankinn hafi þurft að setja leggja til alla vega helming upphæðarinnar. En aðkoma bankans að ferðaskrifstofum TravelCo Nordic hefur þegar kostað bankann ógrynni fjár eins og framkvæmdastjóri Bravo Tours komst að orði nýverið.
