Heimsferðir var ein þeirra sex ferðaskrifstofa sem tilheyrðu danska fyrirtækinu TravelCo Nordic sem var lýst gjaldþrota í lok síðasta mánaðar. Eigandi TravelCo Nordic var Arion banki sem tók danska félagið yfir í uppgjöri sínu við Andra Má Ingólfssonar í júní 2019.
Í tengslum við gjaldþrot TravelCo Nordic þann 23. október sl. keypti Arion banki Heimsferðir út þrotabúinu og líka vörumerki dönsku ferðaskrifstofunnar Bravo Tours. Kaupin á því síðarnefnda voru gerð í félagið við framkvæmdastjóra ferðaskrifstofunnar og danska fjárfesta.
Gjaldþrot TravelCo Nordic mun hins vegar kosta danska ferðaábyrgðasjóðinn á bilinu 100 til 150 milljónir danskra króna eða allt að þrjá milljarða íslenskra króna. Aldrei hefur sjóðurinn orðið fyrir öðru eins tjóni vegna gjaldþrots ferðaskrifstofu þar í landi.
Stjórn sjóðsins hefur nú óskað eftir því að ríkislögmaður í Danmörku taki málið til skoðunar. Samkvæmt frétt Standby í Danmörku snýst beiðnin um að litið verði til samskipta sjóðsins og TravelCo Nordic aftur til ársins 2017 og líka til sölu úr þrotabúi félagsins. Þannig mun sjóðurinn hafa farið fram á auknar tryggingar frá forráðamönnum TravelCo Nordic fyrr á þessu ári en þær hafi ekki veri lagðar fram
Í svari við fyrirspurn Túrista þá staðfestir Birgitte Fjeldhoff, framkvæmdastjóri sjóðsins, að ríkislögmaður Danmerkur hafi verið beðinn um að rannsaka ferlið í kringum fjárhagslega endurskipulagningu TravelCo Nordic og gjaldþrotið. Fjeldhoff segist ekki geta tjáð sig meira um stöðu mála.
Keppinautar Bravo Tours í Danmörku eru líka undrandi á gangi mála. Í viðtali við Standby benda þeir á að hið nýja Bravo Tours fái í raun viðskiptavini gamla félagsins til sín í gegnum ferðatryggingasjóðinn. Réttara hefði verið að sjóðurinn hefði borgað viðskiptavinunum það sem þeir áttu inni hjá gamla Bravo Tours. Í framhaldinu hefði viðskiptavinurinn svo frjáls val um ferðaskrifstofu.
