Það eru áfram í gildi miklar takmarkanir um ferðalög milli landa vegna útbreiðslu kórónaveirunnar. Flugfélög sem sinna engu innanlandsflugi hafa því ekki úr miklu að moða. Farþegafjöldinn hjá Icelandair hefði þannig orðið nærri tvöfalt hærri í október ef Air Iceland Connect væri hluti af starfseminni með greinilegri hætti en nú er.
Finnair, SAS og Norwegian sinna öll innanlandsflugi og geta þar að auki sinnt þeirri starfsemi frá sama flugvelli og alþjóðafluginu. Valkostur sem er ekki í boði hér á landi.
Í október fækkaði farþegum þessara þriggja norrænu flugfélaga þó umtalsvert en samt minna en hjá Icelandair. Þar var samdrátturinn 98 prósentum. Hlutfallið var 92 prósent hjá Finnair, litlu minna hjá Norwegian en ekki nema 78 prósent hjá SAS eins og sjá má á töflunni hér fyrir neðan.
Þar sést líka að stjórnendur Icelandair hafa dregið meiri úr starfseminni en starfsbræður þeirra á hinum Norðurlöndunum. Finnair og SAS halda þannig út mun meiri útgerð en bæði félög eru að miklu leyti í opinberri eigu.
Telja má víst að lega Íslands sé helsta skýringin á því að fraktflutningar Icelandair hafa dregist mun minna saman en hjá keppinautunum. Þannig flutti Icelandair litlu færri tonn í október en á sama tíma í fyrra. SAS og Norwegian gefa aftur á móti ekki upp tölur um fraktflutninga í sínum mánaðarlegu uppgjörum.