Nú hafa flugfélög eins og British Airways, Lufthansa og easyJet gert hlé á ferðum sínum til Íslands. Airbaltic hefur fækkað brottförunum um helming og Wizz air heldur bara úti einni flugleið. Ennþá fljúga svo þotur Icelandair talsvert sjaldnar en flugáætlun félagsins gerir ráð fyrir. Í síðustu viku áttu ferðirnar að vera átján en voru svo aðeins tíu þegar upp var staðið.
Ef Icelandair heldur uppteknum hætti þá stefnir aðeins tuttugu og sex áætlunarferðir héðan í þessari og næstu viku á vegum þriggja flugfélaga. Í þessum ferðum verða sæti fyrir tæplega fimm þúsund farþega.
Til samanburðar voru ferðirnar að jafnaði fjörutíu og sex á degi hverjum á sama tíma í fyrra samkvæmt talningum Túrista. Samdrátturinn nemur því 96 prósentum en hann var 91 prósent í síðasta mánuði líkt og áður hefur verið fjallað.
Það er svo viðbúið að umferðin aukist seinni hlutann í desember þegar Íslendingar búsettir í útlöndum halda heim í jólafrí. Vafalítið munu sóttvarnarreglur á Íslandi og í heimalandi viðkomandi hafa áhrif á ferðalögin en í ljósi þess að ríflega fjörutíu þúsund Íslendingar búa út í heimi má gera ráð fyrir þónokkur hópur vilji fljúga heim.
Til marks um það þá stefna nokkur erlend flugfélög á að taka upp þráðinn í Íslandsflugi á ný um miðjan desember.
