Stærsta flugfélag Frakklands, Air France, hefur hingað til ekki sýnt Íslandsflugi áhuga. Engu að síður eru Frakkar ávallt meðal fjölmennustu þjóða í hópi ferðamanna hér á landi.
Yfir sumarmánuðina 2018 og 2019 komu hingað fjörutíu þúsund franskir ferðamenn en það var um tíu prósent samdráttur frá sumarvertíðunum árin tvö þar á undan.
Skýringin á þeirri niðursveiflu liggur að hluta til í færri áætlunarferðum frá Frakklandi til Íslands eins og sjá má á grafinu hér fyrir neðan.
Óvissan varðandi næsta sumar er auðvitað ennþá mikil en eins og áætlanir flugfélaganna líta út núna þá verða ferðirnar milli landanna tveggja í mesta lagi tuttugu í viku hverri. Það er minna en undanfarin ár (sjá graf).
Það sem meira er þá verður allt flug héðan til Frakklands næsta sumar bundið við París. Alla vega hefur Transavia ekki ennþá sett í sölu ferðir sínar til Nantes en þær voru í fyrsta sinn í boði síðastliðið sumar. Icelandair horfir sem fyrr aðeins til Parísar.
Á árunum 2012 til 2018 var úrvalið ennþá meira því WOW air flaug alltaf til Lyon yfir sumarmánuðina og það var góður stígandi í því flugi. Þannig flutti félagið um nítján þúsund farþega héðan frá þessari næst fjölmennustu borg Frakklands sumarið 2018. Tveimur árum fyrr spreytti félagið sig líka á flugi til Nice.
