Bandaríska hótelfyrirtækið Hyatt rekur í dag rúmlega sextíu hótel í Evrópu og ætlunin er að bæta við alla vega tuttugu hótelum fyrir árslok 2023. Þessi nýju gististaðir munu tilheyra mismunandi hótelkeðjum innan Hyatt.
Í tilkynningu sem Hyatt sendi frá sér á mánudaginn er farið yfir þau verkefni sem nú er unnið að í Evrópu og þar á meðal 172 herbergja hótel í gamla sjónvarpshúsinu við Laugaveg 176.
Það verkefni hefur fasteignafélagið Reitir áður kynnt en eins og fram kom í síðustu viku þá felldi úrskurðarnefnd umhverfis-og auðlindamála úr gildi ákvörðun Reykjavíkurborgar um nýtt deiliskipulag svæðið í kringum gamla sjónvarpshúsið.
Spurður um þá stöðu sem komin er upp þá bendir Guðjón Auðunsson, forstjóri Reita, á að skipulagið hafi verið afturkallað vegna skorts á samráði borgarinnar við aðra lóðarhafa á svæðinu. En ekki vegna efnislegra athugasemda.
„Úrskurðurinn er ekki einsdæmi og framkallar sjaldnast skipulagslega óvissu, en lengir eitthvað skipulagsferlið, sem er auðvitað miður.
Reitir og Hyatt höfðu fyrir nokkru slegið áformum um uppbyggingu á Laugavegi 176 á tímabundin frest í ljósi Covid. Reitir vona að allri óvissu hafi verið eytt þegar umræður við Hyatt um endurskoðaðar opnunardagsetningar hefjast á ný,“ bætir Guðjón við.
Sem fyrr segir þá rekur Hyatt nokkrar hótelkeðjur og mun hótelið í Reykjavík heyra undir Hyatt Centric. Í dag eru sex þannig hótel í Evrópu og ætlunin er að bæta einu við í Cambridge á Englandi og við svo öðru í Reykjavík.
