Samkvæmt upplýsingum frá Icelandair þá stóð ekki til að bæta þessum ferðum til Flórída við jóladagskrá flugfélagsins. Ferðirnar hafa nú verið felldar niður.
Þegar Icelandair kynnti jóla- og áramótadagskrá sína í síðustu viku þá var ekki gert ráð fyrir flugferðum héðan til bandarísku borgarinnar Orlando. Sú borg og nágrenni hennar hefur aftur á móti notið vinsælda hjá Íslendingum og Evrópubúum yfir vetrarmánuðina.
Til marks um það þá flutti Icelandair um fjögur þúsund manns til Orlando í desember í fyrra. Og að jafnaði voru níu af hverjum tíu sætum skipuð farþegum. Það var tölurvert hærra hlutfall en mánuðinn á undan.
Nú hefur Icelandair sett í sölu, með stuttum fyrirvara, flugferðir til Orlando í kringum hátíðarnar. Í boði eru tvær brottfarir fyrir jól og jafn margar eftir áramót.
Flugmiði báðar leiðir frá Keflavíkurflugvelli kostar 128 þúsund krónur með einni ferðatösku. Sá sem flýgur í hina áttina, frá Orlando til Íslands, borgar nokkru minna eða nærri 75 þúsund krónur.
Leiga á bílaleigubíl yfir jól og áramót á Flórída kostar svo álíka mikið.
