Nýverið var kyrrsetningu Boeing MAX þotanna aflétt í Bandaríkjunum og það stefnir í að American Airlines verði fyrsta flugfélagið til að taka þessar umdeildu þotur í gagnið á ný.
Í árslok eru nefnilega lagt upp með að MAX flugvélar verði nýttar í áætlunarferðir American Airlines frá New York til Miami á Flórída.
Áður en að því kemur þá ætla stjórnendur bandaríska flugfélagsins hins vegar að bjóða starfsfólki sínu að setjast um borð. Fyrsta starfsmannaferðin er á dagskrá í dag og mun MAX þota American Airlines taka á loft frá flugvellinum í Dallas í Texas og lenda svo þar á ný stuttu síðar.
Sambærilegar ferðir eru svo á dagskrá fyrir starfsmenn American Airlines í New York og Miami næstu tvær vikur samkvæmt frétt Flight Global.
Evrópsk flugmálayfirvöld hafa ennþá ekki aflétt kyrrsetningu þotanna en í flota Icelandair eru sex MAX flugvélag og jafn margar bætast við á næsta og þarnæsta ári.