Gistinætur útlendinga á íslenskum hótelum í október voru samtals 11.780 sem jafngildir 97 prósent samdrætti frá sama tíma í fyrra. Og þó bandarískir ferðamenn hafi verið sárafáir hér á landi síðan heimsfaraldurinn hófst þá var vægi bandarískra hótelgesta hér á landi hátt í október.
Samtals voru gistinætur Bandaríkjamanna á íslenskum hótelum 4.164 í október eða þrjátíu og fimm prósent af öllum gistnóttum útlendinga í þeim mánuði. Og langstærsti hluti þessara bandarísku gistinátta var á Suðurnesjum eða þrjár af hverjum fjórðum eins og sjá má á töflunni hér fyrir neðan.
Skýringin á þessum fjölda bandarískra hótelgesta hér á landi í október liggur í loftrýmisgæslu Bandaríkjahers hér á landi samkvæmt svari Hagstofunnar við fyrirspurn Túrista.
Þrátt fyrir alla hermennina þá fækkaði gistinóttum útlendinga á hótelum á Suðurnesjum engu að síður um 88 prósent í október. Sem fyrr segir var lækkunin á landsvísu hins vegar 97 prósent.
Bretar og Þjóðverjar voru þær þjóðir sem komu á eftir Bandaríkjamönnum þegar kemur að fjölda gistinátta eins og sést á súluritinu.