Keflavíkurflugvöllur er eina norræna flughöfnin sem fjögur stærstu flugfélög Norður-Ameríku fljúga til. Og verulegur hluti af rekstri Icelandair byggir á ferðum til Bandaríkjanna og Kanada. Þetta tíðu ferðir vestur um haf skýra óvenju hátt hlutfall bandarískra ferðamanna hér á landi.
Sumarið 2019 stóðu þeir undir 29 prósent gistinátta á íslenskum hótelum. Til samanburðar var hlutfall bandarískra hótelgesta rétt um fimm af hundraði í Noregi. Vægi Bandaríkjamanna var líka um fimm prósent í Vínarborg og Berlín svo fleiri dæmi séu tekin.
Íslensk ferðaþjónstufyrirtæki og þá sérstaklega Icelandair eiga mikið undir því að bandaríski markaðurinn opnist fljótlega. Ef það gerist ekki nægjanlega snemma fyrir komandi sumarvertíð þá er ljóst að Icelandair þarf ekki bara að fækka ferðunum til Bandaríkjanna heldur líka til Evrópu. Stór hluti af farþegum félagsins eru nefnilega tengifarþegar á leið yfir Norður-Atlantshafið.
Ef félagið fækkar svo ferðunum til Þýskalands, Frakklands, Bretlands og Norðurlandanna þá er dregur verulega úr heildarframboði á Íslandsflugi næsta sumar frá Evrópu. Hlutdeild Icelandair er nefnilega mjög há. Ástæðan er meðal annars sú að mörg af umsvifamestu flugfélögum Evrópu sinna ekki Íslandsflugi.
Ryanair er það félag sem flytur flesta farþega innan álfunnar en þotur þess hafa hingað til ekki sett stefnuna á Keflavíkurflugvöll. Sömu sögu eru að segja um systurfélögin Air France og KLM, tvö af stærstu flugfélögum Evrópu.
Hið þýska Lufthansa flýgur vissulega hingað allt árið um kring en dótturfélag þess, Eurowings, er að leggja niður sínar ferðir til Íslands. Og önnur félög innan Lufthansa samsteypunnar hafa haldið sig fjarri. Farþegar stórra evrópskra flugfélaga eins og Aer Lingus, TAP, Aeroflot og Turkish Airlines hafa heldur ekki kost á Íslandsflugi.
Öll þessi félög sem eru nefnd hér að ofan halda úti ferðum til hinna Norðurlandanna. Flugið þangað tekur líka oftast skemmri tíma en til Íslands. Fjarlægðin flækir því útgerðina eins og einn af framkvæmdastjórum Lufthansa útskýrði í viðtali við Túrista.
Í dag er ekki vitað hvenær flugsamgöngur verða með eðlilegri hætti innan Evrópu og hvað þá milli heimsálfa. En ef ferðamannastraumurinn hingað næsta sumar verður aðallega frá Evrópu þá er fjarvera stórra flugfélaga veikleiki fyrir íslenska ferðaþjónustu. Og líka sú staðreynd að Evrópuflug Icelandair byggir á því Ameríka sé opin.
