Flugrekstur Cabo Verde Airlines á Grænhöfðaeyjum hefur legið niðri síðan í upphafi heimsfaraldursins. Launagreiðslur til starfsmanna hafa á sama tíma dregist og nokkrum dögum fyrir jól gagnrýndu forsvarsmenn stéttarfélaga á Grænhöfðaeyjum stöðu mála.
Létu þeir í veðri vaka að grípa þyrfti til aðgerða ef stjórnvöld tækju ekki af skarið en það er ríkissjóður Grænhöfðaeyja fer með 36 prósent hlut í flugfélaginu á móti íslensku fjárfestunum.
Spurður um stöðu mála þá segir Erlendur Svavarsson, forstjóri Cabo Verde Airlines, að laun allra starfsmanna flugfélagsins séu nú í skilum en stór hluti þeirra sé á hlutabótaleiðinni.
„Fyrirtækið hefur verið án tekna síðan í mars og þess vegna hafa launagreiðslur tafist. Nú í lok árs fékk fyrirtækið lánafyrirgreiðslu sem tryggði greiðslu launa fyrir jól,“ segir Erlendur í svari til Túrista.
Sem fyrr segir eru það íslenskir fjárfestar sem fara með meirihluta í Cabo Verde Airlines og forsætisráðheyrra eyjaklasans sagði nú í haust að viðræður um frekari aðkomu hins opinbera að flugfélaginu væru snúnar.
Erlendur staðfestir að hluthafarnir séu ennþá í viðræðum um framtíð félagsins en hann sé sannfærður um að samkomulag muni nást.
„Þegar það samkomulag liggur fyrir verður unnt að hefja flug að nýju, þegar markaðsaðstæður leyfa.“
