Það var tilkynnt í lok síðasta vetrar að samþætta ætti rekstur systurfélaganna Air Iceland Connect og Icelandair. Níu mánuðum síðar er ennþá unnið að því að samræma bókunarkerfi félaganna tveggja og ekki er vanþörf á. Því samkvæmt athugun Túrista getur munað miklu á verði farmiða sem bókaðir eru annars vegar inn á vef Icelandair og hins vegar Air Iceland Connect. Jafnvel þó um sé að ræða nákvæmlega sömu flugferðirnar.
Þannig þarf sá sem ætlar frá Egilsstöðum til Stokkhólms, 2. til 9.júlí, að borga 101.790 krónur fyrir flugmiða alla leið ef bókað á vef Icelandair. Viðkomandi verður þó að koma sér sjálfur milli Reykjavíkurflugvallar og Keflavíkurflugvallar.
Ef farþeginn bókar hins vegar innanlandsflugið hjá Air Iceland Connect og millilandaflugið hjá Icelandair þá kostar allt ferðalagið næstum 29 þúsund krónum minna.
Þessu er svo öfugt farið ef Akureyringur ætlar til Amsterdam í byrjun júní. Þá er ódýrara að kaupa alla fjóra flugleggina hjá Icelandair. Þar kostar þeir 72.440 en 80.605 krónur ef bókað er í sitthvoru lagi.
Bandaríkjamaður sem ætlar frá Seattle til Ísafjarðar sparar sér svo um sjö þúsund krónur með því að bóka farmiða alla leið á vef Icelandair.
Hins vegar borgar það sig ekki fyrir Þjóðverjann sem stefnir á að fljúga frá Frankfurt til Akureyrar að bóka allt á einu bretti hjá Icelandair. Sá endar með að borga 16 þúsund krónum meira en ef hann hann pantar innanlandsflugið sérstaklega hjá Air Iceland Connect.
Þess ber að geta að í öllum þessum dæmum hér að ofan er um að ræða farmiða með farangursheimild.
