Þotur þýska flugfélagsins Lufthansa taka stefnuna á Keflavíkurflugvöll á ný í næstu viku. Í boði verða tvær ferðir fyrir jól og í framhaldinu mun flugfélagið fljúga eina til tvær ferðir í viku hingað til lands.
„Brottfarirnar til Íslands fyrir jól og áramót eru bókaðar í takt við væntingar okkar,“ segir Boris Ogursky, talsmaður Lufthansa í svari til Túrista. Hann bætir við að nú bóki fólk með styttri fyrirvara en áður og því sé erfitt að segja til um hvernig framboðið þróist.
Eins og staðan er núna gerir Lufthansa þó ráð fyrir daglegum ferðum milli Frankfurt og Keflavíkurflugvallar í sumar. Til viðbótar eru svo á dagskrá tvær brottfarir í viku frá Munchen.
Líkt og Túristi greindi nýverið frá þá er ekkert Íslandsflug á dagskrá Eurowings, dótturfélags Lufthansa, í sumar. Á sama tíma sinna önnur flugfélög innan þýsku samsteypunnar ekki Íslandsflugi ef frá er talið leiguflug á vegum Austrian Holidays frá Vínarborg yfir hásumarið.