Það er ennþá óljóst hvenær ferðalög milli heimsálfa verða með eðlilegum hætti á ný. Því er ekki útilokað að ferðamannastraumurinn hér á landi næsta sumar verði að miklu leyti bundinn við evrópska túrista líkt og í ár.
Og í ljósi óvissunar sem ennþá ríkir vegna kórónuveirunnar þá verða bókanir á ferðalögum næsta sumars væntanlega gerðar með óvenju stuttum fyrirvara.
Ef það verður raunin þá ætti íslensk ferðaþjónusta að horfa sérstaklega til þýska markaðarins því samkvæmt upplýsingum frá Booking.com þá voru Þjóðverjar sú erlenda þjóð sem bókaði flestar gistingar hér á landi yfir sumarmánuðina þrjá.
Hollendingar og Frakkar eru líka ofarlega á blaði eins og sjá má á listanum hér fyrir neðan. Íslendingar sjálfir voru aftur á móti langfjölmennastir á gististöðum landsins og það endurspeglast í lista Booking.com.