„Því miður er flugið til Reykjavíkur ekki lengur sjálfbært miðað við núverandi eftirspurnarstig,” sagði talskona American Airlines aðspurð um ákvörðun félagsins um að leggja niður Íslandsflug félagsins frá Philadelphia næsta sumar. Þar með dregst framboð á áætlunarflugi frá Bandaríkjunum til Íslands saman um alla vega fimmtíu þúsund sæti næsta sumar.
Ísland er þó ekki eini evrópski áfangastaðurinn sem lenti í niðurskurði American Airlines í Philadelphia. Félagið hefur einnig hætt við boðaðar ferðir þaðan til Manchester á Englandi, Prag í Tékklandi og Feneyja á Ítalíu. Þó er gert ráð fyrir að félagið taki upp þráðinn að nýju í þeirri síðastnefndu sumarið 2022.
Aftur á móti er ákvörðunin varðandi flug til Keflavíkurflugvallar, Manchester og Prag endanlega samkvæmt úttekt bandaríska flugritsins Cranky Flier.
American Airlines heldur í fyrri áform sín um að fljúga frá Philadelpia til Aþenu, Barcelona, Edinborgar og Shannon á Írlandi í sumar.
Þó framboð á flugi American Airlines til Evrópu dragist saman eftir þessar breytingar þá hefur félagið boðað aukið flug til Mið- og Suður-Ameríku í sumar.