Nýverið hætti American Airlines við að fljúga til Keflavíkurflugvallar í sumar frá Philadelphia í Bandaríkjunum. Stjórnendur Delta sjá hins vegar tækifæri í hefja flugið til Íslands frá New York fyrr en áður var gert ráð fyrir. Á sama tíma hefur bandaríska flugfélagið seinkað fyrstu ferð sinni hingað frá Minneapolis.
Þotur Delta á JFK flugvelli í New York munu aftur á móti taka stefnuna á Ísland strax 2.apríl sem er föstudagurinn langi í ár. Fyrri áætlun gerði ráð fyrir að vertíðin myndi hefjast í byrjun maí.
Delta hóf að fljúga til Íslands sumarið 2011 og hefur hingað til nýtt Boeing 757 þotur í daglegt flug til Íslands yfir sumarmánuðina. Ferðirnar hafa verið færri yfir vetrarmánuðina.
Nú í sumar verða brottfarirnar fimm í viku en á móti kemur að Delta mun fljúga Boeing 767 breiðþotum til Keflavíkurflugvallar að þessu sinni. Bæði frá New York og líka frá Minneapolis. Í þessum flugvélum eru sæti fyrir 226 farþega og þar af eru 26 beddar á fyrsta farrými fyrir þá sem vilja sofa almennilega á leiðinni.
Fyrsta ferð Delta frá Minneapolis til Keflavíkurflugvallar er núna á dagskrá um miðjan júní en áður var áformað að hefja flugið undir lok maí.
Þess ber að geta að Túristi hefur árangurslaust leitað skýringa hjá Delta á þessum breytingum.
Icelandair gerir ráð fyrir flugi til bæði New York og Minneapolis í sumar og eins munu þotur United fljúga hingað daglega frá Newark flugvelli í New York frá og með byrjun júní.