Farþegum á flugvellinum í Dublin hefur fækkað um 77 prósent í ár og nú ætla flugmálayfirvöld á Írlandi að veita flugfélögum viðbótarafslætti næsta sumar og lækka farþegagjöldin um leið.
Flugvöllurinn í Dublin er einmitt einn þeirra sem stjórnendur Isavia horfa til sem keppinaut þegar kemur að farþegum á leið yfir Norður-Atlantshafið. Farþegagjöldin á Keflavíkurflugvelli eru hins vegar töluvert hærri en í Dublin og nú mun bilið breikka ennþá frekar.
Þannig lækkar farþegagjaldið í Dublin um tíund nú í sumar fyrir flugfélög sem keyra flugvélarnar upp að flugstöðinni og verður það 1535 krónur (9,8 evrur) á hvern farþega. Ef flugfélög láta sér nægja að stoppa út á flughlaðinu á lækkar gjaldið um þriðjung og verður 814 krónur (5,2evrur).
Farþegagjaldið á Keflavíkurflugvelli er reyndar aðeins lægra eða 797 krónur (5,09 evrur). Þar á bæ bætist hins vegar við öryggisgjald upp á 1350 krónur á hvern brottfararfarþega. Öryggisgjaldið er aftur á móti innifalið í farþegagjaldinu í Dublin samkvæmt svörum þaðan við fyrirspurn Túrista.
Heildar brottfarargjaldið á hvern farþega á Keflavíkurflugvelli er því 2147 krónur á gengi dagsins eða fjörutíu prósent hærra en hæsta gjaldið í Dublin. Munurinn er hins vegar nærri þrefaldur ef horft er til lægstu gjaldanna á írska flugvellinum.
Hið nýja hvatakerfi í Dublin eykur svo ennþá meira á muninn. Þá munu nefnilega flugfélög sem ná helmingi af þeim farþegafjölda sem þau voru með 2019 og 2020 fá helmings afslátt af gjöldum viðbótarfarþeganna. Ef flugfélög ná hins vegar sjötíu prósent af fyrri farþegafjölda þá borga þau ekkert fyrir þá viðbót.
Núverandi hvatakerfi Keflavíkurflugvallar byggja hins vegar á því að veita afslætti fyrir nýjar flugleiðir. Ekki þær sem fyrir eru.
Flugmálayfirvöld í Dublin gera ráð fyrir að endurgreiða allt að 50 milljónir evra (7,8 milljarða kr.) til flugfélaga í tengslum við þetta nýja hvatakerfi.
„Við sjáum að flugfélög eru núna að taka ákvarðanir um hvert eigi að fljúga þotunum næsta sumar og margir viðskiptavinir okkar eru með minni flota núna en í fyrra,“ segir Dalton Philips, forstjóri flugvallarins í Dublin, í viðtali við The Irish Times, um hið nýja hvatakerfi.
Líkt og fram kom í nýrri úttekt OECD þá eru tekjur Keflavíkurflugvallar á hvern farþega eru mun meiri en almennt gerist á evrópskum
flugvöllum. Stærsti viðskiptavinur flugvallarins hefur þó ekki gagnrýnt þá verðstefnu opinberlega og framboð á flugi hefur aukist verulega síðustu ár.