Líkt og hjá Icelandair þá var efnt til hlutafjárútboða hjá Finnair, SAS og IAG, móðurfélagi BA og fleiri félaga, í fyrra. Til viðbótar gengu þessi þrjú félög öll frá lánagreiðslum fyrir lok síðasta árs. Finnair fékk pening frá finnska ríkinu, SAS frá því norska og IAG á almennum markaði.
Í tengslum við samþykkt Alþingis á 120 milljón dollara láni (15,3 milljarðar kr.) til Icelandair Group sl. haust þá var haft eftir forsvarsmönnum flugfélagsins að ef eftirspurn taki ekki við sér og umsvifin verði áfram í lágmarki þá myndi félagið draga á lánalínuna með sumrinu eða haustinu í ár.
Spurð hvort útilokað sé að Icelandair þurfi að ganga á lánalínu ríkisins fyrir sumarið, í ljósi þess að félagið má aðeins taka út 20 milljónir dollara á mánuði, þá segir Ásdís Pétursdóttir, upplýsingafulltrúi Icelandair, að ekkert hafi komið til sem kalli á kauphallartilkynningu. Hún segir það farveginn til að upplýsa um þessi mál.
Í tengslum við uppgjör Icelandair fyrir fyrstu níu mánuði síðasta árs þá sagði að lausafjárstaða félagsins næmi 399 milljónum dollara í lok september síðastliðinn (55 milljarðar kr. á þáverandi gengi). Lánalínan frá ríkinu var hluti af þeirri upphæð.
Spá stjórnenda Icelandair gerir ráð fyrir að rekstrarkostnaður fyrirtækisins, frá byrjun október 2020 til loka mars 2021, nemi samtals um 126 milljónum dollara. Á öðrum fjórðungi þessa árs verður kostnaðurinn samtals 88 milljónir dollara samkvæmt spánni sem birt var í kynningu í tengslum við hlutafjárútboðið í haust.
Á þeim fjórðungi er reyndar búist við fjórfalt meira sætisframboði á mánuði en núna á fyrsta fjórðungi þessa árs. Ekki er að finna spá um framboð á þriðja fjórðungi ársins en í ljósi þess að ennþá er bið eftir því að eftirspurn glæðist þá eru vísbendingar um að framboð í sumar verði takmarkaðra en gert er ráð fyrir í næstu sumaráætlun Icelandair.
En líkt og Túristi hefur áður fjallað um þá hefur árstíðarsveiflan í rekstri Icelandair verið töluvert meiri en keppinautanna. Félagið á því meira undir sumarvertíðinni komið.
