„Aðgerðir Norwegian skapa tækifæri fyrir Icelandair,“ segir í fyrirsögn viðtals Morgunblaðsins við Boga Nils Bogason, forstjóra Icelandair, um síðustu helgi. Þar er ræðir forstjórinn þá ákvörðun stjórnenda Norwegian að hætta flugi milli Evrópu og Norður-Ameríku og þá oftar en ekki í mikilli samkeppni við Icelandair.
Það eru þó vísbendingar um að boðaður niðurskurður hjá Norwegian muni einnig hafa töluverð áhrif á starfsemi norska flugfélagsins hér á landi. En fyrir heimsfaraldurinn var Norwegian það flugfélag sem flutti flesta farþega milli Íslands og Spánar. Sex af hverjum tíu sem ferðuðust héðan til Tenerife flugu til að mynda með Norwegian.
Íslendingar á leið til Kanarí og Alicante hafa einnig notið góðs af tíðum ferðum félagsins þangað. Og fyrir íslenska ferðaþjónustu hefur áætlunarflug Norwegian til Íslands frá Madríd og Barcelona yfir vetrarmánuðina verið mjög þýðingarmikið. Fjöldi spænskra ferðamanna á Íslandi yfir háveturinn þrefaldaðist og kortavelta Spánverjar jókst um hundruðir milljónir króna á mánuði.
Kortaveltan upp í nærri 900 milljónir
Þetta sýnir samanburður á kortaveltu Spánverjar á fyrsta ársfjórðungi 2016 og 2019. Í ársbyrjun 2016 var ekkert beint flug hingað frá meginlandi Spánar og þá nam kortavelta Spánverja hér á landi samtals 341 milljón króna. Fyrstu þrjá mánuðina 2019 var Norwegian hins vegar með tvær til þrjár ferðir í viku frá Barcelona, Madríd og Alicante.
Á því tímabili var kortavelta spænskra ferðamanna 897 milljónir króna. Hækkunin nemur hátt í tvö hundruð milljónum króna á mánuði frá sama tíma árið 2016. Þessa þróun mátti líka sjá í kortaveltu Spánverjar í janúar og febrúar árið 2020 áður en heimsfaraldurinn stöðvaði ferðalög milli landa.
Þrefalt fleiri ferðamenn
Auðvitað er það ekki svo að allir þeir spænsku ferðamenn sem hingað komu hafi flogið með Norwegian. En vafalítið hafa margir þeirra gert það því fjöldi spænskra ferðamanna þrefaldaðist á milli fyrsta fjórðungs 2016 og 2019. Viðbótin nam 7443 ferðamönnum og á þessu tímabili nam sætaframboð Norwegian um 15 þúsund sætum.
Þessi aukning í fjölda spænskra ferðamanna og kortaveltu þeirra er vísbending um hversu mikilvægt er að koma upp tíðum ferðum á ný milli Íslands og meginlands Spánar næsta vetur. Boðaður niðurskurður í starfsemi Norwegian mun sennilega hafa áhrif á ferðir félagsins til Íslands frá Spáni. Það sést til að mynda á því hversu há fargjöldin á þessum flugleiðum eru í dag. Þess háttar verðlagning er oft undanfari þess að flugið er fellt niður. Talsmenn félagsins verjast þó fregna af stöðunni þegar Túristi hefur óskað skýringa.
Stjórnendur Icelandair hafa ekki sýnt vetrarferðum til Spánar áhuga
Spænska flugfélagið Vueling hefur reyndar haldið úti ferðum til Íslands einn og einn vetur síðustu ár en það hefur Icelandair ekki gert. Og það félag virðist frekar horfa til þess að flytja Íslendinga í frí til Tenerife en að fljúga ferðamönnum til Íslands frá meginlandi Spánar yfir veturinn.
Að öllu óbreyttu fer því íslensk ferðaþjónusta á mis við milljarða veltu spænskra ferðamanna yfir vetrarmánuðina. Það eru því ekki að sjá að í niðurskurði Norwegian séu einhver tækifæri fyrir íslensk ferðaþjónustufyrirtæki, nema kannski Icelandair.
