Innan evrópska fluggeirans hefur verið tekist á um hvort framlengja eigi undanþágu frá lágmarksnýtingu á lendingarleyfum á flugvöllum. Almenna reglan er sú að flugfélög verða að nýta þessi svokölluðu slott í að lágmarki áttatíu prósent tilvika ef þau ætla að halda þeim áfram.
Þannig myndi Icelandair missa slottin sín á Heathrow flugvelli nema fljúga þangað að minnsta kosti ellefu ferðir í viku að jafnaði. Þetta eru einmitt lendingarleyfin sem ríkið fær mögulega veð í ef Icelandair gengur á 16 milljarða kr. lánalínuna sem Alþingi samþykkti sl. haust.
Meira frátekið en notað verður
Vegna heimsfaraldursins var fallið frá þessari kröfu um lágmarksnýtingu á flugvöllum út um allan heim í fyrrasumar og nú í vetur einnig. Yfirvöld vestanhafs hafa framlengt þessa undanþágu fyrir komandi sumar og það gerðu bresk stjórnvöld einnig í gær.
Ráðamenn Evrópusambandsins vilja fara aðra leið og þeirra útgáfa mun þá einnig gilda á Keflavíkurflugvelli. En eins og Túristi hefur áður fjallað um þá er Icelandair með frátekin fleiri lendingarleyfi á flugvellinum nú í sumar en félagið hefur áður fengið. Play sótti svo um álíka mörg leyfi og WOW air var með í lokin.
Ennþá er Play þó ekki komið með flugrekstrarleyfi en þess háttar er forsenda fyrir því að fá leyfunum úthlutað.
Draugahúsið í Gatwick
Innan Evrópu hafa tekist á tvö ólík sjónarmið um hvort framlengja eigi undanþáguna. Stjórnendur hefðbundinna flugfélaga eins og Lufthansa hafa barist fyrir áframhaldandi framlengingu og jafnvel hótað því að fljúga tómum þotum til að uppfylla kröfu um 80 prósent nýtingu.
Forráðamenn lágfargjaldaflugfélaga eins og Wizz Air og Ryanair hafa hins vegar farið fram á endurúthlutun á illa nýttum lendingarleyfum. Undir þann málflutning hafa stjórnendur Gatwick flugvallar í London tekið. Þeir sjá nefnilega fram á að Norwegian og British Airways skilji eftir stór göt í dagskrá flugvallarins í sumar. Á sama tíma vill Wizz Air og líka hið bandaríska Jet Blue komast að á Gatwick. Forstjóri Wizz Air segir að breska flugstöðin verði eins og draugahús að öllu óbreyttu.
Helmings nýting að lágmarki
Ráðamenn ESB leggja hins vegar til að flugfélög fái að skila allt að helmingi þeirra leyfa sem þau hafa í dag en afsali sér þeim þó ekki fyrir sumarið 2022. Leyfin sem flugfélögin vilja halda verður hins vegar að nýta í að minnsta kosti helmingi tilfella.
Endanlega tilkipun um þessa niðurstöðu hefur ekki verið gefin út en búist er við henni seinnihlutann í febrúar samkvæmt . Um leið ætti þá að skýrast hvernig málum verður háttað á Keflavíkurflugvelli og hvort flugáætlanir flugfélaganna taki miklu breytingum í kjölfarið.