Í fjárfestakynningu sem gefin var út í tengslum hlutafjárútboð Icelandair Group í september var að finna spá sérfræðinga flugfélagsins um sætisframboð næstu ársfjórðunga.
Eins og gefur að skilja var þá, líkt og núna, erfitt að ráða í þróun heimsfaraldursins og áhrifa hans á flugsamgöngur. En jafnvel þó spáin hafi verið gefið út undir lok þriðja ársfjórðungs þá var skekkjan umtalsverð á þeim fjórðungi. Hún varð svo ennþá meiri á þeim næsta.
Á þriðja fjórðungi 2020 gerði spá Icelandair nefnilega ráð fyrir að meðalframboð félagsins yrði að jafnaði 255 milljónir sætiskílómetrar á mánuði. Raunin varð hins vegar 173 milljónir sætiskílómetrar eða um þriðjungi minna en spáð var.
Á fjórða fjórðungi varð mismunurinn ennþá meiri eins og sjá má á súluritinu hér fyrir neðan. Skekkjan þá nam 69 prósentum.
Í hluthafakynningunni er líka að finna spá fyrir fyrstu fjórðunga þessa árs. Á þeim fyrsta er gert ráð fyrir að framboðið nemi aðeins 77 milljónum sætiskílómetra á mánuði. Í ljósi nýlegs niðurskurðar á áætlun Icelandair á þessu tímabili má gera ráð fyrir að framboðið verði nokkru minna.
Og hvort áætlunin fyrir annan fjórðung, apríl til júní, gangi eftir verður líka að teljast ólíklegt í ljósi óvissunnar sem ennþá ríkir varðandi ferðalög milli landa. Það er þó ekki útilokað að stjórnendur Icelandair ákveði að auka framboðið umtalsvert í vor og sætti sig í staðinn við mjög lága sætanýtingu.
Þess háttar aðgerð er þó kostnaðarsöm en kannski óumflýjanleg til að koma rekstrinum í gang og endurráða áhafnir.
