Flugáætlunin sem Icelandair birti um miðjan janúar gerði ráð fyrir að farþegaþotur félagsins myndu taka á loft að jafnaði tvisvar á dag frá Keflavíkurflugvelli núna í febrúar.
Á dagskránni voru daglegar ferðir til Kaupmannahafnar og eins var ætlunin að fljúga til London, Amsterdam, Boston, Munchen og Frankfurt.
Núna hefur áfangastöðunum og brottförunum næstu vikur hins vegar verið fækkað.
Engar ferðir eru lengur áformaðar til Þýskalands í febrúar og ferðunum til Kaupmannahafnar fækkað um þriðjung. Samtals munu þotur Icelandair því fljúga 43 áætlunarferðir frá Keflavíkurflugvelli í þessum mánuði.
Þar með verður sætisframboðið rétt um fimm prósent af því sem það var í febrúar 2019 samkvæmt útreikningum Túrista. Gera má ráð fyrir að farþegafjöldinn dragist hlutfallslega mun meira saman enda hefur sætanýtingin verið lág nú í heimsfaraldrinum.