Eftir að ferðatakmarkanir vegna COVID-19 urðu almennar, undir lok síðasta vetrar, þá fækkaði utanferðum Íslendinga snarlega og hingað komu miklu færri útlendingar.
Þessi þróun hafði skiljanlega gríðarleg áhrif á tollfrjálsa verslun hér á landi en hún er að mestu bundin við Keflavíkurflugvöll enda lítið um alþjóðaflug frá öðrum flugvöllum.
Allt árið í fyrra nam kortanotkun með íslensk og erlenda greiðslukort í tollfrjálsri verslun hér á landi um 3,1 milljarði króna. Árið áður var veltan 11,8 milljarðar og 12,1 milljarður árið 2018 samkvæmt tölum úr gagnasafni Rannsóknarseturs verslunarinnar.
Bróðurpartur veltunnar í fyrra átti sér stað á fyrsta fjórðungi ársins þegar hún nam samtals 1,9 milljarði króna en þá voru landamæri ennþá að mestu opin.
Eins og sjá má á súluritinu hér fyrir neðan þá standa íslensk greiðslukort undir tveimur þriðja hluta veltunnar í íslenskum fríhöfnum. Það hlutfall hefur lítið breyst síðustu þrjú ár.
Til samanburðar þá var rétt um fimmti hver brottfararfarþegi á Keflavíkurflugvelli í fyrra með íslenskt vegabréf. Við þann samanburð verður að hafa í hug að Íslendingar búsettir í útlöndum nota vafalítið oft erlend greiðslukort í fríhöfninni og útlendingar búsettir á Íslandi greiða að sama skapi með íslenskum.