Eftir að ljóst varð að ekkert yrði að rannsókn Pfizer lyfjaframleiðandans hér á landi þá hefur gengi hlutabréfa í Icelandair fallið um sautján af hundraði. Á sama tíma hefur einn af stærstu hluthöfunum selt bréf í flugfélaginu.
Þannig hefur hlutur lífeyrissjóðsins Gildi lækkað úr 5,2 prósent niður í 5,03 prósent síðastliðna viku samkvæmt hluthafalistum Icelandair sem gefnir voru út 10. febrúr og hins vegar í gær. Lækkun eignar Gildis á þessu sjö daga tímabili nemur 50 milljón hlutum.
Ef sjóðurinn heldur áfram að selja bréf sín í Icelandair og fer undir fimm prósent eignarhlut þá þarf að tilkynna þá breytingu til kauphallarinnar.
Fyrr í vikunni rakti Viðskiptablaðið hvernig Gildi hefur losað hluti í Icelandair frá því í útboði flugfélagsins sl. haust. Eftir útboðið átti sjóðurinn 6,61 prósent hlut og var stærsti einstaki hluthafinn.
Sameiginleg eign A og B-deildar lífeyrissjóðsins LSR nam reyndar 7,99 prósentum. Sá hlutur er kominn niður 5,02 prósent og þar af á A-deildin 4,03 prósent. Fyrir síðustu áramót var einmitt tilkynnt þegar eign A-deildarinnar fór undir 5 prósent mörkin.