Í dag takmarkast samgöngurnar milli Íslands og Bandaríkjanna við ferðir Icelandair til Boston og er sú útgerð styrkt af íslenska ríkinu. Í bókunarvél Icelandair er þó að finna beint flug til fleiri bandarískra borga frá og með lokum mars.
Það kom hins vegar fram í máli forstjóra flugfélagsins á Víglínunni á Stöð 2 á sunnudag að stefnt er á að hefja áætlunarflug til Bandaríkjanna snemma í sumar.
Þar er því útlit fyrir að Icelandair felli niður stóran hluta af þeim brottförum sem núna er hægt að bóka vestur um haf með félaginu í lok vetrar og í vor.
Og biðin eftir þotum Delta á Keflavíkurflugvelli lengist sömuleiðis. Nú hefur félagið tekið úr sölu allar ferðir sínar hingað frá New York í apríl og fyrsta brottför er nú á dagskrá 2. maí. Í framhaldinu er gert ráð fyrir fimm flugum í viku frá stórborginni.
Núna á hins vegar að nýta Boeing 757 þotur í ferðirnar hingað í stað Boeing 767 breiðþota. Þar með dregst sætisframboðið þónokkuð saman því í breiðþotunum eru 226 sæti en á 168 til 199 sæti í Boeing 757 þotunum.
