Sumaráætlanir flugfélaga taka formlega gildi í lok mars en ljóst er að þá verða enn í gildi strangar sóttvarnaraðgerðir við flest landamæri. Áætlanir erlendu flugfélaganna á Keflavíkurflugvelli gera því ekki ráð fyrir tíðum ferðum hingað til lands á næstunni.
Hið breska easyJet hefur til að mynda fellt niður allar ferðir sínar til Íslands í mars og í flestum tilfellum alveg fram í maí. En bresk stjórnvöld gáfu það út í vikunni að í fyrsta lagi þann 17.maí verði slakað á takmörkunum varðandi ferðalög til útlanda.
Wizz Air hefur að sama skapi tekið út flestar ferðir sínar til Íslands í mars og apríl frá Luton en líka Mílanó og Dortmund. Áfram eru ferðirnar frá nokkrum pólskum flugvöllum á dagskrá út veturinn.
Biðin eftir því að þotur Finnair taki stefnuna á ný á Ísland lengist líka en finnska félagið er þó ennþá með daglegar ferðir hingað á áætlun í sumar.
Vueling heldur fast í fyrri áform um að bjóða upp á páskaflug til Íslands frá Barcelona en svo verður aftur gert hlé á ferðunum hingað og fyrst í maí verður byrjað að fljúga þrisvar í viku.