Áætlun þýska lággjaldaflugfélagsins Eurowings gerði ekki ráð fyrir neinum ferðum til Íslands í sumar. Nú stefnir hins vegar í að Airbus þotur félagsins muni fljúga hingað til lands frá bæði Dusseldorf og Hamborg. Fyrsta ferð er í byrjun júní og sú síðasta í lok september.
Flogið verður þrisvar í viku frá Dusseldorf og tvisvar frá Hamborg. Fargjöldin í þessar ferðir Eurowings eru þó mjög há eins og staðan er í dag. Skýringin á því er sú að flugið er nýkomið í bókunarvél félagsins og fargjöldin munu taka breytingum innan skamms samkvæmt svörum frá félaginu.
Eurowings er hluti af Lufthansa samsteypunni og hefur um árabil flogið til Íslands en hefur dregið töluvert úr ferðunum hingað síðustu ár.
Með endurkomu Eurowings fær Icelandair samkeppni í flugi til Hamborgar en aftur á móti verður þýska flugfélagið eitt um ferðirnar frá Dusseldorf. Icelandair spreytti sig reyndar á flugi til þeirrar borgar eftir Airberlin varð gjaldþrota. Þá sagði þáverandi forstjóri Icelandair að með brotthvarfi Airberlin hefðu opnast ný tækifæri fyrir tengiflug Icelandair milli Dusseldorf og áfangastaða Icelandair í Norður-Ameríku.
Íslenska félagið hóf svo flug til Dusseldorf en sú útgerð lagðist af. Sumaráætlun Icelandair í ár gerir ráð fyrir ferðum til fjögurra þýskra borga; Munchen, Frankfurt, Berlín og Hamborg. Þotur Lufthansa munu svo fljúga hingað frá þeim tveimur fyrstnefndu.