Fjármálaráðherra Grænhöfðaeyja hefur fengið heimild til að veita Cabo Verde Airlines ríkislán upp á 16 milljónir evra. Sú upphæð jafngildir 2,5 milljörðum króna. Þeir fyrirvarar eru settir við lánveitinguna að undirritað verði samkomulag milli hluthafa um aðkomu að endurskipulagningu flugfélagsins.
Einnig er sett skilyrði um að kröfuhafar komi til móts við stöðu félagsins með niðurfellingu skulda og lengri greiðslufrestum líkt og Erlendur Svavarsson, forstjóri Cabo Verde Airlines, útskýrði í samtali við Túrista í síðustu viku.
Icelandair Group fer í dag fyrir 36 prósent hlut í Cabo Verde Airlines. Fyrirtækið ætlar þó ekki að leggja aukið fé í reksturinn á Grænhöfðaeyjum. Þetta kemur fram í svari við fyrirspurn Túrista.
Icelandair Group er jafnframt einn af kröfuhöfum Cabo Verde Airlines í gegnum dótturfélög. Bókhaldslega áhætta samsteypunnar, um síðustu áramót, var þó óveruleg þar sem færðar hafi verið svokallaðar varúðarfærslur vegna krafnanna að því segir í svari Icelandair.
Hlut sinn í Cabo Verde Airlines eignaðist íslenska samsteypan í byrjun árs 2019 þegar meirihlutinn í þessu helsta flugfélagi Grænhöfðaeyja var keyptur í félagi við íslenska fjárfesta. Ríkissjóður Grænhöfðaeyja á 39 prósent á móti Íslendingunum og starfsmenn flugfélagsins eiga tíund.