Stjórnendur ungverska lágfargjaldaflugfélagsins Wizz Air hafa sótt inn á nýja markaði í yfirstandandi heimsfaraldri. Flugfélagið er til að mynda að hasla sér völl í innanlandsflugi í Noregi og á Ítalíu og opnaði nýverið sína fyrstu starfsstöð utan Evrópu, nánar tiltekið í Abu Dhabi.
Og nú hefur sumaráætlun félagsins verið stækkuð til muna með 120 nýjum flugleiðum. Þar kennir ýmissa grasa þó fókusinn hjá félaginu sé áfram á flug til og frá austurhluta Evrópu.
Þessar viðbætur við sumarprógramm Wizz Air ná þó ekki til Keflavíkurflugvallar. Dagskrá félagsins þar á bæ er nefnilega óbreytt frá síðasta sumri og áfram gert ráð fyrir reglulegum ferðum hingað frá ellefu evrópskum borgum. Þar af eru fimm í Póllandi.