Bókunarstaða bandarískra flugfélaga batnar í hverjum mánuði og sérstaklega þegar kemur að ferðum innanlands. Alþjóðaflugið hefur einnig tekið við sér en ennþá horfa Bandaríkjamenn ekki langt út í heim.
Þannig takmarkast bókanir á millilandaflugi frá Bandaríkjunum aðallega við Mið-Ameríku og áfangastaði við Karabíska hafið. Þetta sýnir ný úttekt á vegum IATA, alþjóðasamtaka flugfélaga.
Þar kemur fram að í janúar í ár nam sala bandarískra flugfélaga á millilandaflugi rétt um 16 prósentum af því sem var í janúar 2019. Í febrúar hækkaði hlutfallið uppí fimmtung. Fyrstu tíu dagana í mars nam salan um þriðjungi af því sem hafði verið á sama tíma fyrir tveimur árum síðan.
Bókunarstaðan í innanlandsfluginu er miklu betri því fyrstu dagana í mars var salan 66 prósent af því sem var á sama tíma í hittifyrra.
Íslandsflugið ekki aftur á dagskrá
Þessar tölur frá IATA eru í takt við það sem stjórnendur American Airlines hafa gefið frá sér síðustu daga. Félagið reiknar þannig með að flestar þotur félagsins verði komnar í notkun á ný í sumarbyrjun. Er þar verið að bregðast við aukinni eftirspurn eftir innanlandsflugi og styttri ferðum út í heim.
American Airlines hafði ráðgert að hefja flug til Íslands frá Philadelphia nú í vor en af því verður ekki. Boðaðar breytingar við íslensku landamærin, þar sem bólusettir ferðamenn geta komist hjá sóttkví, breyta engu þar um samkvæmt svörum sem Túristi hefur fengið frá bandaríska flugfélaginu.
Í lok síðustu viku tilkynnti aftur á móti Delta flugfélagið að frá og með maí myndu þotur félagsins fljúga til Íslands frá þremur bandarískum borgum. Þar bættist við áætlunarflug frá Boston en áður hafði félagið gert ráð fyrir reglulegu ferðum til Keflavíkurflugvelli frá bæði New York og Minneapolis.
