Þjóðverjar eru vanalega næst fjölmennasta þjóðin í hópi ferðamanna hér á landi yfir sumarmánuðina. Og það stefndi í að Icelandair, Lufthansa og Wizz Air yrðu ein um áætlunarflugið milli Íslands og Þýskalands í sumar.
Nýverið hóf svo lágfargjaldafélagið Eurowings, dótturfélag Lufthansa, að selja farmiða til Íslands. Þeir voru hins vegar dýrir og Túristi fékk þær skýringar hjá flugfélaginu að verðlagningin myndi taka breytingum á næstunni.
Nú tveimur vikum síðar hafa fargjöldin lækkað verulega og kosta ódýrustu farmiðarnir, aðra leið, nú rétt um 8 þúsund krónur af fljúga á til Hamborgar. Ef ferðinni er heitið til Dusseldorf kostar farmiðinn að lágmarki tæpar þrettán þúsund krónur.
Eurowings verður eitt um ferðirnar milli Íslands og Dusseldorf en á í samkeppni við Icelandair í fluginu til Hamborgar. Það gæti skýrt hvers vegna flugið til Hamborgar er ódýrara.
Lægstu fargjöld Icelandair til hafnarborgarinnar kosta 15.955 kr. en aðeins af farþeginn bókar heimflug á sama tíma. Ef það er ekki gert þá hækkar farmiðinni upp í 36 þúsund krónur. Hjá Eurowings eru farþegarnir ekki bundnir af því að bóka báðar leiðir til að fá lægstu fargjöldin.
Með tilkomu Eurowings þá verður hægt að fljúga beint til Íslands frá sex þýskum borgum, þ.e. Berlín, Frankfurt, Munchen, Hamborg, Dortmund og Dusseldorf.