Bandaríska flugfélagið Delta ætlar að hefja flug til Íslands á ný í maí frá New York, Minneapolis og Boston. Þetta verður í fyrsta sinn sem flugfélagið býður upp á áætlunarflug til Íslands frá þeirri síðastnefndu.
Bandarískir ferðamenn hafa lengi verið fjölmennastir í hópi ferðamanna hér á landi og þeir stóðu undir fjórðu hverri gistinótt útlendinga á íslenskum hótelum árið 2019.
Davíð Torfi Ólafsson, framkvæmdastjóri Íslandshótelanna, stærstu hótelkeðju landsins, segist ánægður með nýja áætlun Delta.
„Ferðaþjónustan í heild sinni hlýtur að fagna þessum tíðindum. Það skiptir nefnilega miklu máli að svona stór flugfélög séu með ferðir til Íslands. Svo ekki sé talað um áætlunarferðir frá þremur fjölmennum bandarískum borgum. Þetta er líka gott fyrir neytendur því samkeppnin eykst,“ segir Davíð Torfi.
Hann bendir á að íslensk ferðaþjónusta reiði sig alfarið á flugsamgöngur og því hafi það verið högg þegar flugfélög fóru að taka úr ferðir til Íslands. „Þessi viðbót frá Delta er því mjög jákvæður viðsnúningur,“ bætir Davíð Torfi við.