Bandaríska flugfélagið Delta hefur um árabil flogið til Íslands frá bæði New York og Minneapolis og þá í samkeppni við Icelandair. Nú ætlar bandaríska félagið að bæta við daglegum ferðum hingað frá Boston en sú borg hefur lengi vegið þungt í leiðakerfi Icelandair.
Félagið flutti þannig fleiri farþega frá Logan flugvelli í Boston allt árið 2019 en frá nokkrum öðrum flugvelli vestanhafs. Í heildina var farþegafjöldinn í flugi til New York, til bæði Newark og JFK, þó meiri.
En það er engan bilbug að finna á forsvarsfólki Icelandair þrátt stóraukið Íslandsflug Delta nú í sumar.
„Við fögnum allri samkeppni hér eftir sem hingað til. Þessar fréttir styðja við það sem við höfum sagt – að það verði mikil tækifæri fyrir Ísland sem áfangastað eftir COVID,“ segir Ásdís Pétursdóttir, upplýsingafulltrúi Icelandair, aðspurð um tíðindi dagsins.
Þess má geta að gengi hlutabréfa Icelandair lækkaði um sex prósent í dag eftir að fréttir bárust af áformum Delta á Keflavíkurflugvelli.