Það eru þrjú flugfélög sem stefna á að fljúga reglulega milli Íslands og New York í sumar. Delta, Icelandair og United Airlines en samtals nýttu nærri áttatíu þúsund farþegar sér flug félaganna þriggja frá fjölmennustu borg Bandaríkjanna til Íslands yfir sumarmánuðina árið 2019.
Á þessari stundu er þó óljóst hvenær ferðalög milli Norður-Ameríku og Evrópu verða með eðlilegum hætti á ný. Og nú hafa stjórnendur United Airlines tekið þá ákvörðun að leggja niður fjölda flugferða til Evrópu frá bandarískum borgum í sumar.
Þannig verður ekkert af flugi félagsins til Amsterdam frá Washington né ferðunum frá Chicago til Zurich og Edinborgar. Niðurskurðurinn nær einnig til Evrópuferða frá Newark flugvelli við New York. Þannig var sölu á farmiðum þaðan til Berlínar, Genfar og Glasgow hætt í síðustu viku.
Ennþá er hins vegar hægt að bóka far með United frá Newark til Íslands í sumar. Það er þó ekki öruggt að þessar ferðir verði hluti af endanlegri sumaráætlun samkvæmt svörum frá flugfélaginu.
Þar segir að áfram verði fylgst náið með eftirspurn eftir ferðalögum og flugáætlun United verði aðlöguð í takt við þá stöðu.