Það var umframeftirspurn í hlutafjárútboði Norse Atlantic Airways sem lauk seinnipartinn í gær. Þetta nýja flugfélag er því komið með hlutafé upp á 1,3 milljarða norskra króna. Það jafngildir um nítján milljörðum íslenskra króna.
Útboðið hófst klukkan níu á miðvikudagsmorgun og strax klukkutíma síðar höfðu fjárfestar skráð sig fyrir öllum þeim hlutabréfum sem í boði voru.
Það eru ekki aðeins efnaðir Norðmenn sem ætla að leggja fé í hið nýja flugfélag. Stofnanafjárfestar þar í landi hafa í heildina veitt vilyrði fyrir fjárfestingu upp á 550 milljónir norskra króna, um átta milljörðum íslenskra króna.
Hugmyndin að baki Norse Atlantic Airways er sú taka við keflinu frá Norwegian og bjóða upp á ferðir milli Evrópu og Norður-Ameríku í Boeing Dreamliner þotunum sem Norwegian er nú að losa sig við.
Og þetta er ekki eina tenging Norse Atlantic Airways við Norwegian. Því Bjørn Kjos, stofnandi og fyrrum forstjóri Norwegian, er meðal stærstu hluthafa nýja flugfélagsins. Bjørn Kise, fyrrum stjórnarformaður Norwegian, er líka í hluthafahópnum.
Norse Atlantic Airways stefnir á að hefja flug í árslok og meðal áfangastaða sem nefndir hafa verið eru París, London, New York, Los Angeles og Miami.