Sumarið 2011 hóf Delta að fljúga til Íslands frá New York og fimm árum síðar frá Minneapolis. Áður hafði Icelandair verið eitt um flugið hingað frá þessum tveimur bandarísku borgum. Nú í sumar ætlar Delta einnig að skora Icelandair á hólm í Íslandsflugi frá Boston.
Ferðirnar til Boston stóðu undir fimmtán prósent af farþegafjöldanum í flugi Icelandair til Bandaríkjanna árið 2019.
Vægi Minneapolis var miklu lægra eða rétt um sex af hundraði í hittifyrra. Sætanýtingin í flugi Icelandair til þeirrar borgar lækkaði reyndar mikið sumarið 2019. Þá var hún rétt 77 prósent en var 91 prósent sumarið 2015. Árið áður en Delta hóf samkeppnina við Icelandair í Minneapolis.
Þróunin hjá Delta var önnur í flugi frá Minneapolis til Íslands. Þar hækkaði sætanýtingin ár frá ári eins og sjá má á línurítinu hér fyrir neðan.
Það verður þó að hafa í huga að þeir farþegar sem nýta sér ferðir Icelandair frá Bandaríkjunum eru oft á leið yfir á meginland Evrópu. Farþegar Delta eru hins vegar fyrst og fremst bandarískir ferðalangar. Einnig var markumtalað ójafnvægi í leiðkerfi Icelandair sumarið 2018 og 2019 sem hafði neikvæð áhrif á gang mála hjá félaginu.
