Það þarf fimm milljarða króna til að tryggja rekstur hins verðandi flugfélags Play út næsta ár samkvæmt frétt Viðskiptablaðsins í dag. Heimildir blaðsins herma að leitað hafi verið til stærstu lífeyrissjóða landsins um að fjárfesta í félaginu og stefnt sé að því að setja bréf í Play á First North hlutabréfamarkaðinn innan skamms.
Það er sama leið og farin var í tengslum við stofnun Flyr flugfélagsins í Noregi fyrr í þessum mánuði. Flyr er ekki ennþá komið með flugrekstrarleyfi en hefur tryggt sér um níu milljarða króna í hlutafé. Þann 1. mars sl. fóru hlutabréfin á markað í Noregi og hækkaði gengi þeirra um nærri fimmtung fyrsta daginn.
Þau hafa hins vegar lækkað um 28 prósent frá þeim hápunkti og í dag er gengið um tíund undir útboðsgenginu. Á þessu tímabili hefur einn þeirra sem lögðu Flyr til fé í upphafi, norski auðjöfurinn Arne Fredly, selt um þrjá fjórðu af hlutabréfunum sínum í Flyr samkvæmt fréttum Dagens Næringsliv.
Stofnandi Norwegian Bjørn Kjos, sem jafnframt var forstjóri félagsins um langt skeið, kemur svo að stofnun annars flugfélags í Noregi sem fengið hefur heitið Norse Atlantic Airways. Áform aðstandenda þess félags eru að skrá félagið á markað í Noregi nú í vor og standa vonir til að jómfrúarferðin verði farin í árslok.