Nú í morgunsárið fór Boeing MAX þota á vegum Icelandair í loftið frá Keflavíkurflugvelli og lenti hún í Kaupmannahöfn nú fyrir stundu. Þetta er í fyrsta sinn í tvö ár sem MAX þota eru nýtt í farþegaflug á vegum Icelandair enda voru allar flugvélar af þessari tegund kyrrsettar í mars árið 2019 eftir tvö flugslys þar sem 346 manns misstu lífið. Flugbanninu var fyrst aflétt í byrjun þessa árs.
MAX þoturnar eru um fjórðungi sparneyttari en hinar gömlu Boeing 757 og Boeing 767 sem fyrir eru í flugflota Icelandair. Og nú þegar olíuverð hefur hækkað um rúmlega sextíu prósent frá því að hlutafjárútboð Icelandair fór fram síðastliðið haust þá vaknar sú spurning hvort félagið taki fleiri slíkar í gagnið.
Endurráðningar á flugmönnum gefa þó ekki til kynna að það sé á stefnuskránni.
Gerðu ráð fyrir lægra olíuverði næstu ár
Kaup á þotueldsneyti stóð undir fjórðungi af einingakostnaði Icelandair árið 2018 samkvæmt því sem fram kom í fjárfestakynningu félagsins í september í fyrra. Í þeirri kynningu var jafnframt birt spá um þróun eldsneytisverðs og hún gerir ráð fyrir að það verði um þriðjungi lægra í ár og þau næstu í samanburði við árin 2018 og 2019.
Olíuverðið í dag er rétt um sjötíu dollarar á tunnu sem er sama verð og í mars 2019 þegar MAX þoturnar voru kyrrsettar.
Fimmtán sóttu um flugstjórastöðurnar
Samtals hefur Boeing afhent Icelandair sex MAX þotur en aðeins tvær þeirra hafa verið teknar úr geymslu. Félagið auglýsti ársbyrjun eftir flugstjórum á MAX þoturnar og fimmtán umsóknir bárust frá þeim sjötíu flugmönnum sem þá voru við störf hjá félaginu.
Um miðjan febrúar voru svo tuttugu flugmenn til viðbótar ráðnir en þeir áttu allir að fara til starfa á eldri flugvélum líkt og Túristi greindi frá á sínum tíma.
Icelandair líkt og fleiri flugfélög hafa hins vegar gert framvirka samninga um kaup á eldsneyti og festa þannig verðið á ákveðnum hluta af eldsneytisnotkuninni til lengri tíma. Sparnaður félagsins af því að taka í notkun sparneyttari flugvélar er því líklega hlutfallslega minni en sem nemur verðhækkunum á olíu á heimsmarkaði.
