Líkt og hjá Icelandair þá hefur flug til Bandaríkjanna og Kanada vegið þungt í rekstri Aer Lingus. Og stjórnendur beggja flugfélaga skilgreina þau sem „value airline“ sem er þá einskonar blanda af hefðbundnu flugfélagi og lágfargjaldaflugfélagi.
Hingað til hefur Ameríkurflug Aer Lingus takmarkast við brottfarir frá írskum flugvöllum. Frá og með sumrinu ætlar írska félagið einnig að bjóða upp á áætlunarflug vestur um haf frá Manchester.
Fyrsta brottför Aer Lingus frá ensku borginni er á dagskrá þann 29. júlí þegar þotur félagsins munu fljúga bæði New York og Orlando.
Í október bætist svo við flug til Barbados og frá og með sumrinu 2022 mun írska flugfélagið einnig fljúga frá Manchester til Boston.
Í áætlunarferðirnar til New York og Boston verða nýjar Airbus A321LR nýttar en breiðþotur af gerðinni A330-300 munu flytja farþegana til Orlando og Barbados.
Þeir sem eiga erindi á milli Manchester og Bandaríkjanna hafa um langt skeið haft kost á því að fljúga með Icelandair alla leið með stuttri millilendingu á Keflavíkurflugvelli.
Ferðalagið með Icelandair til JFK flugvallar í New York er þó þremur klukkutímum lengra, hvora leið, í samanburði við beina flugið hjá Aer Lingus. Sú staðreynd gerir það að verkum Icelandair verður ekki eins fýsilegur kostur nema ef fargjöldin eru nokkuð lægri en hjá keppinautnum.
Lausleg könnun Túrista á fargjöldum milli Manchester og New York í ágúst leiðir í ljós að fargjöld Icelandair og Aer Lingus sveiflast umtalsvert milli daga. Í sumum tilvikum er um þriðjungi ódýrara að fljúga með írska flugfélaginu en það getur líka verið hátt í helmingi dýrara aðra daga.