Um mánaðamótin ætlar bandaríska flugfélagið Delta að hefja flug til Keflavíkurflugvallar á ný. Í öllu kynningarefni félagsins vestanhafs er tekið skýrt fram að eingöngu þeir bólusettu sleppi við sóttkví við komuna til Íslands.
Icelandair stefnir svo á að fjölga ferðum sínum vestur um haf töluvert í maí og samtals munu flugfélögin tvö geta flutt um 22 þúsund ferðamenn til landsins í næsta mánuði.
Ekki hafa fengist upplýsingar frá flugfélögunum um eftirspurn eftir þessum flugsætum og því leitaði Túristi til bókunarsíðunnar Booking.com sem er sú umsvifamesta í heimi á sínu sviði.
Í svari fyrirtækisins segir að um leið og eldgosið hófst í Fagradalsfjalli, þann 19. mars, þá hafi Bandaríkjamenn byrjað að leita í mun meira mæli eftir gistingu á Íslandi. Síðan þá hefur verið stígandi í leit bandarískra notenda Booking.com eftir íslenskri gistingu.
Og af samtölum Túrista að dæma, við forsvarsfólk nokkurra stórra íslenskra ferðaþjónustufyrirtækja, þá hafa bandarískir ferðamenn ekki bara tryggt sér hótelgistingu hér á landi í næsta mánuði heldur líka bílaleigubíla og alls kyns afþreyingu.
Sem fyrr segir þá verða 22 þúsund sæti á boðstólum í þotunum sem fljúga munu frá Bandaríkjunum til Íslands í næsta mánuði. Í júní eykst svo framboðið umtalsvert. Þá hefur bandaríska flugfélagið United til að mynda flug til Íslands á ný.
Ennþá liggur þó ekki fyrir hvenær Íslendingar geta haldið vestur um haf í frí. Inn fyrir landamæri Bandaríkjanna komast nefnilega aðeins íbúar landsins og þeir sem eiga þangað brýnt erindi. Bólusettir Bandaríkjamenn munu þó komast til Íslands án þess að þurfa í sóttkví.