Það stóð til að taka Marriott Edition hótelið við Hörpu í notkun í vor líkt og Túristi greindi frá í ársbyrjun. Þá hafði Rúv það jafnframt eftir Richard L. Friedman, forstjóra Carpenter & Company, sem stendur að byggingunni, að framkvæmdir væru á lokastigi.
Það verður þó ekkert af opnun þessa fimm stjörnu hótels á næstu vikum. Í svari frá Editon hótelkeðjunni, við fyrirspurn Túrista, segir að ekki sé komin föst dagsetning opnunina en hún verði í september eða október.
Þessi seinkun mun meðal annars skrifast á þau óhagstæðu skilyrði sem heimsfaraldurinn hefur valdið í ferðaþjónstu um víða veröld.
Auk hótelsins í Reykjavík þá er stefnt að opnun Edition hótela í Róm, Tókýó og Dubaí í ár. Á næsta ári bætast svo önnur fjögur hótel við keðjuna.