Ennþá liggur ekki fyrir hvort bresk stjórnvöld ætla að opna fyrir ferðalög til og frá landinu þann 17. maí næstkomandi. British Airways gerir þó ekki ráð fyrir að hefja Íslandsflug að nýju fyrr en í byrjun júlí.
Wizz Air og easyJet taka hins vegar upp þráðinn í flugi sínu hingað frá Luton flugvelli, skammt frá London, strax um þarnæstu mánaðamót samkvæmt núgildandi áætlun. Og af fargjöldunum að dæma er nóg af lausum sætum.
Hjá Wizz Air kosta flugmiðarnir, frá Íslandi til bresku höfuðborgarinnar, á bilinu 20 til 50 evrur, aðra leið. Það jafngildir um 3.000 til 8.800 kr. Hjá Wizz air þurfa farþegarnir reyndar að borga fyrir allan handfarangur sem ekki kemst undir sætin.
Takmarkanirnar eru ekki eins strangar hjá easyJet varðandi handfarangur. Þar eru lægstu fargjöldin líka hærri en hjá Wizz Air. Ódýrasti farmiðinn hjá easyJet frá Keflavíkurflugvelli til Luton kostar t.d. 40,5 evrur eða 6.200 kr. Sá dýrasti í júní er á 90 evrur eða um 13.700 krónur.
Auk Wizz air og easyJet þá gerir Icelandair ráð fyrir ferðum til London í júní. Bæði til Heathrow og Gatwick.