Sætisframboð Icelandair átti að ríflega fjórfaldast milli fyrsta og annars fjórðungs þessa árs samkvæmt þeirri spá sem sérfræðingar flugfélagsins settu fram í tengslum við hlutafjárútboðið síðastliðið haust. Sú aukning hefur ekki gengið eftir nú í apríl.
Viðskiptakálfur Moggans segir hins vegar frá því í dag að stjórnendur Icelandair hafi kynnt flugmönnum félagsins áform um að fimmfalda framboðið frá því sem nú er og fram í lok júní. „Gert er ráð fyrir að á þeim tíma verði um 100 ferðir í boði hjá félaginu í viku hverri,“ segir í frétt Moggans.
Ef rétt reynist þá er ljóst að skera þarf niður núverandi áætlun flugfélagsins um helming.
Á heimasíðu félagsins eru nefnilega á boðstólum rétt rúmlega tvö hundruð brottfarir frá Keflavíkurflugvelli í viku að jafnaði nú í júní. Það er rétt um sextíu prósent af því sem var sumarið 2019.
Túristi hefur óskað eftir skýringum frá Icelandair varðandi þennan mögulega niðurskurð en í svari frá flugfélaginu segir að ekki sé hægt að tjá sig um málið svo nálægt birtingu uppgjörs. En á morgun, fimmtudag, verður uppgjör fyrir fyrsta fjórðung þessa árs kynnt.
Í frétt Moggans segir líka að gangi áætlanir Icelandair eftir geri félagið ráð fyrir að vera með 180 til 200 flugmenn að störfum í sumar. Það er rétt um þrjátíu prósent af fjöldanum sem starfaði hjá félaginu sumarið 2019.
