Hlutafjáraukningu í hinu verðandi flugfélagi Play er lokið og í dag var listi yfir stærstu hluthafana birtur.
Þar sést að þrír sjóðir í vörslu Íslandssjóða, dótturfélags Íslandsbanka, fara samtals með 5,43 prósent hlut í Play. Þar á meðal er sjóður sem kallast IS Hlutabréfasjóðurinn. Sá hefur verið meðal tuttugu stærstu hluthafa Icelandair eftir hlutabréfaútboð félagsins sl. haust en er það ekki lengur.
Þannig átti sjóðurinn nærri 219 milljón hluti í Icelandair samkvæmt hlutahafalista sem birtur var fyrir tveimur vikum síðan. Sú eign jafngilti 0,77 prósentum í flugfélaginu.
Samkvæmt nýbirtum hluthafalista Icelandair Group er IS Hlutabréfasjóðurinn hins vegar ekki lengur meðal tuttugu stærstu hluthafa. En til að komast inn á listann í dag þarf viðkomandi að eiga í hið minnsta 0,7 prósent í Icelandair.
Það má því ljóst vera að IS Hlutabréfasjóðurinn hefur losað sig við að minnsta kosti rúmlega tuttugu milljónir hluta í Icelandair síðustu tvær vikur. Á sama tíma hefur sjóðurinn aftur á móti eignast 1,67 prósent í Play.
Túristi hefur óskað eftir upplýsingum frá Íslandssjóðum um söluna í Icelandair og kaupin í Play en ekki fengið ennþá.