Fyrstu þrjá mánuði ársins fækkaði farþegum í Flugstöð Leifs Eiríkssonar um 95 prósent. Það er hlutfallslega aðeins meiri samdráttur en á stærstu flugvöllum Norðurlanda.
Þar hefur farþegunum líka fækkað gríðarlega í ár eins og sjá má á súluritinu hér fyrir neðan.
Flugvöllurinn í Kaupmannahöfn sem hefur verið sá fjölfarnasti á Norðurlöndunum er til að mynda komin niður fyrir bæði Ósló og Stokkhólm þegar horft er til fjölda farþega.
Hafa ber í huga að það er eingöngu hér á landi sem innanlands- og alþjóðaflug er aðskilið. Það hefur þau áhrif að niðursveiflan verður meiri á Keflavíkurflugvelli en á hinum flugvöllunum því innanlandsflug hefur ekki dregist eins mikið í heimsfaraldrinum og ferðalög á milli landa hafa gert.