Sætisframboðið hjá Icelandair á fyrsta fjórðungi ársins var fjórðungi minna en spáð var í fjárfestakynningu í tengslum við hlutafjárútboð félagsins síðastliðið haust.
Þar var gert ráð fyrir að framboðið yrði að jafnaði 77 milljónir sætiskílómetra á mánuði. Raunin varð hins vegar rétt um 59 milljónir sætiskílómetrar eða 24 prósent minna en spáð var.
Munurinn á spánni og raunverulegu framboði er þó lítill þegar horft er til fyrsta fjórðungs ársins 2019. Ef spáin hefði gengið eftir hefði samdrátturinn numið 92 prósentum en hann varð 94 prósent í raun og veru.
Spá sérfræðinga Icelandair í haust gerði ráð fyrir að framboðið hjá félaginu á seinni hluta síðasta árs yrði nokkru meira en raunin varð eins og sjá má hér fyrir neðan. Það sama á svo við um fyrsta fjórðung þessa árs sem fyrr segir.
