Bandaríska flugfélagið United Airlines ætlar að hefja Íslandsflug á ný frá Newark flugvelli við New York í byrjun júní. Nýtt áætlunarflug hingað frá Chicago bætist svo við mánuði síðar. Bob Schumacher, yfirmaður sölumála United Airlines, segir þá viðbót eiga sér lengri aðdraganda en halda mætti.
„Það liggur beint við fyrir okkur að stækka með því að bæta við ferðum frá Chicago. Þar er starfsemi United mjög umsvifamkil og farþegum okkar standa til boða tengingar í allar áttir. Farþegar frá öllum Bandaríkjunum og víðar geta þá nýtt sér ferðirnar þaðan til Íslands,” svarar Schumacher spurður hvort Íslandsflugið frá Chicago hafi komið til vegna óvenjulegra aðstæðna í heiminum í dag.
Hann bætir því við að innan raða United ríki ánægja með að snúa tilbaka til þeirra markaða sem er á góðum stað í faraldrinum og eru reiðubúnir til að taka á móti bólusettum ferðamönnum frá Bandaríkjunum.
Þörf fyrir að komast út í heim
Er eftirspurn eftir flugi United til Íslands?
„Við sjáum hraðan bata í flugi innan Bandaríkjanna og sérstaklega í kringum helgar og hátíðir. Bókanir bætast hratt við og það hefur líka áhrif á alþjóðaflugið. Um leið og ferðir bætast við út í heim þá eru viðtökurnar góðar. Við gerum okkur vonir við að það verði líka raunin með flugið til Íslands og annarra Evrópulanda. Nú þegar sjáum við þriggja stafa tölur í fjölda bókana í fyrstu flugin frá New York til Íslands í júní,” útskýrir Schumacher.
Bókanir í ferðirnar frá Chicago er þó færri og það var viðbúið að sögn Schumacher. Bæði vegna þess að sú flugleið er ný en líka þar sem lengra er í fyrstu brottför.
Og til marks um aukin áhuga Bandaríkjamanna á ferðum til Evrópu þá jókst leit eftir Evrópuflugi á heimasíðu United um 19 prósent síðastliðinn sunnudag í framhaldi af yfirlýsingu ráðamanna ESB um að opna á ferðalög Bandaríkjamanna í sumar.
Sjá til með veturinn
Síðustu ár hefur United aðeins flogið til Íslands yfir sumarmánuðina og Schumacher segir engar ákvarðanir hafa verið teknar um hvort breyting verði þar á. „Við erum með flugvélar til að fljúga en metum aðstæður hverju sinni og reynum að vera eins lipur og við mögulega getum.”