Lífeyrissjóðurinn Birta ætlar að fjárfesta milljarði króna í hinu verðandi flugfélagi Play. Þar með verður sjóðurinn einn af þremur stærstu hluthöfunum samkvæmt Fréttablaðinu í gær.
Þóra Eggertsdóttir, yfirmaður innanlandsflugs Icelandair, er einn af fjórum fulltrúum Samtaka atvinnulífsins í stjórnar Birtu. Og aðspurð segir Þóra, í svari til Túrista, að hún hafi vikið af stjórnarfundi í sjóðnum þar sem fjárfestingin í Play var rædd.
Þóra segir að ákvörðun Birtu varðandi Play muni ekki hafa áhrif á setu hennar í stjórn lífeyrissjóðsins.
Þess má geta að Birta á 1,34 prósent hlut í Icelandair í dag. Vægi sjóðsins var umtalsvert meira fyrir hlutafjárútboð flugfélagsins síðastliðið haust en þar sem Birta tók hins vegar ekki þátt í útboðinu þá þynntist eignarhluturinn verulega.